في اطار سلسلة تجربة شهرين في امريكا اش بان ليكم ضربوا معايا دويرة فالمغرب ونديكم تا لامريكا ا سيدي يلاه . يلاه ديرو شي دكة وربطوا حزام السلامة.
😀😀 Let's go....🇺🇲✈️✈️✈️✈️✈️✈️✈️
وااخا الشاف شاركتي فالقرعة شهر 10 وبعد 7 شهور من الانتظار شهر 5 ضربتي طليلة لقيتي احلى رسالة فور في العالم
YOU HAS BEEN RENDMLY SELECTED🤸
هنا غادي تشدك الطيارة صراحة غادي يتخربقوا ليك المشاعر. يلاه نوض جري بوس للميمة الحنينة راسها وماتنساس باك كذلك . غادي تصبر واحد النهار ولا يومين بيدما تكون وجدتي راسك لواحد الطريق تيق طويلة وفيها بزاف ديال التفكير والتخطيط حيت بصح خاصك بزاف ديال طلع وهبط وفوطوكوبي ومصاريف وزيد وزيد انا جايك التفاصيل . مباشرة خاصك تقلب على شي ولد الناس لي يعطيك عنوان شي واحد يكون ساكن فبلاصة و حدة ماشي غير كيتنقل لان اوراقك مهمة وخاصها توصل لأيادي أمنة... ، لقيتي العنوان ياك ؛!! معلم ارا دابا لاخطر واهم مرحلة انا كنسميها (السهل الممتنع) لان فعلا استمارة DS260 هي وتيقة ماكتقبلش الخطأ نهائيا، الخطأ= تاخير موعد المقابلة. ركز مزيان ونتا كتعمر فيها و نصيحة ماتعمرهاش بوحدك حيت غالبا غادي تزكل شي حرف ولا شي كلمة(بالتجربة ) ونهار تنجح انا نعمرها ليك ان شاء الله تعالى.
(ملاحظة مهمة كلما عمرتيها بكري كلما جاك موعد المقابلة بكري) سعدي فرحي ... درتي اول خطوة نحو الوصول لبلاد العم سام . هاااااا
دابا خاصك تقلب على المخرج ديال هاد الفيلم عرفتي شكون هو !!؟؟؟ المستضيف ايييه المستضيف هو كولشي فهاد السيناريو (سطر مزيان على كلمة المستضيف راني كنهدر معاك بالتجربة )
المستضيف غادي يختصر عليك 90٪ من الطريق لي طوييييييييييييييييييييلة بزاف غاوجد راسك تابعك فيلم سامحيني فيها بزاف د الاجزاء انا غادي ندكرهم ليك. راك غاتبدا من الصفر.( هنا العبرة بالبدايات ماشي بالخواتيم )
مزيااااان واسترح ليك شي شوية وضرب شي دكة كيفما قلت ليك فالاول . ملي غادي تصيفط DS260 غادي يوصلك Email confirmation فيه بلي توصلوا ليها خاصك تسنا تايطلع رقمك فالنشرة (النشرة هي واحد الحاجة كاتخرج كل 15 فالشهر تقريبا كايطلعوا فيها ارقام الفائزين لي غادي يجيهم الموعد ) دابا غير تشوف رقمك فيها خاصك تصيفط استفسار ل KCC لي هوما مكلفين بدارسة ملفات القرعة. 24او 48 ساعة غادي يجاوبوك يا إما DS260 ديالك تدرسات ولا باقي.
لنفترض تدرسات غادي تسنا واحد اسبوع او 10 ايام غادي يوصلك ميساج ف Email غادي يقوليك خاصك دخل للصفحة الأولى فين تسجلتي باش تشوف امتا عندك الموعد (اليوم+ الساعة+المكان).
يا حليلي والله الا جاك الموعد شكون بحالك 😁😁😁
ارا برع الدولار ينادي
اول مرحلة هي الطبيب .والطبيب حريرة تاهوا
كاينين 3 الاطباء مكلفين بالقرعة فالمغرب كامل
(الفهري + برادة + جناح )غادي تتصل بهم كاملين لي شد ليك هو هاداك وراه غادي تجاوبك سكرتيرة تقوليك (امتا عندك الموعد + اسمك + واش مزوج + شحال عندك من ولد + واش داير Vaccine وهنا خاصك ترد البال حيت خاصك تكون داير 2 فقط وكل وحدة تكون مباعدة على لخرا ب 15 ليوم ) من بعد غادي تقوليك تنعيط ليك خاصك تصبر تاتعيط ليك واحد 4 ايام او اقل او اكتر على حساب
شفتيها تعطلات عاود عيط (ماتصرطش ليهم تشااااا ريح را ميريكان هادي )
غادي تتسجل ف ARAMEX باش توصلك فاليزا ديالك ملي يدوز كولشي بخير (ضروري ومؤكد تسجل فيه)
غادي تتصل بيك تعطيك موعد وهنا خاصك تكون موجد راسك وموجد وراقيك وتدي معاك 2500درهم تقريبا (700درهم ديال consultation+درهم 220 ديال الراديو ديال الصدر+ 1200درهم ديال التحاليل+ 630درهم ديال التحاليل) اه الا سولك الطبيب على بوشويكة قوليه داز فيا . لا قلتي لا غادي تخلص 400درهم غادي تسنا فالعشية ترجع تاخد الملف الطبي ديالك الا كان داكشي هو هاداك غادي يعطيوه ليك وتمشي مبروك عليك يوم المقابلة بين يديك .الا كان عندك شي مشكل (يعني مرض معدي بحال: السل او الزوهري او او او (قلب على الامراض المعدية باش تاخد فكرة ). هاااا هنا الطبيب غادي يقوليك لازم تعاود دير تحليلة المشكلة هاد التحليلة كادار ف فرنسا وكتاخد شهرين تقريبا ) لهلا يكتبها على شي حد حيت لاجات فيك غادي تعيش واحد العداب مايعلم بيه غا الله .
ايوا مبروك هانتا قربتي تجي عدنا بقات ليك اخر مرحلة هي المقابلة .
المقابلة هي كولشي هنا خاصني نشرح ليك بزاف د الحوايج واخا عييت بالكتابة ولكن دعي معايا وخلي ليا شي قليب لتحت ...
قبل ماتمشي للمقابلة وجد راسك مزيان وحاول تحيد منك الستريس والخوف . ماتبقاش مخلوع هادي مجرد مقابلة والارزاق بيد الله . غادي تمشي لتما يميخلوك مزيان فالباب ولداخل لاتكون هاز شي ممنوعات ماتدي معاك تا حاجة. غادي تحط وراقيك وتخلص 330دولار لي هي 3300درهم . وتسنا نوبتك . قلبك غادي يكون كايزدح ورجليك ماهازينك غاصبر كلنا دزنا من ديك الوقفة يارب السلامة كاتحس براسك بحالا يوم القيامة غاتحاسب . غاتسمع سميتك فلان بن فلان... تكعد . غاتوقف قدام القنصل غادي يسولك كيداير ا معيزو بخير واش توما ....
باش غادوز المقابلة بالعربية ولا الانجليزية . نتا غاتكون قلتي باش غادوز فالاول عند هاداك لي غادي يشد عندك الأوراق فالاول . هنا اصديقي فكر مزيان وشوف الساهلة . كنتي عارف راسك ناضي كانادي كنصحك دوز بالانجليزية حيت القنصل غادي يعجبوا الحال وماغاديش يعطلك وغاتاخد الفيزا بالخف. كنتي زرك الزمر دوز غا بالعربية اشداك لشي انجليزية بلا مادير فيها قافز تبقا طلق ليه دوك الكلمات ديال الاعدادي. راهم ماواكلينش لا تصدق داير بحال واحد الاخت قاليها القنصل فين باغا تخدمي لا مشيتي بقوة الخلعة عوض ماتقوليه super market قالت ليه market place 🤣🤣🤣🤣 بقا كايخرا عليها بالضحك حشم وعطاها الفيزا . سمع مزيان دوز باش نتا مرتاح راه كاين مترجم . غا هو لاطحتي عند واحد العزوة مصيبة كحلة غادي يبردك مزيان
يويويويو ✈️✈️✈️✈️✈️🇺🇲🇺🇲🇺🇲🇺🇲🤸🤸🤸🤸🤸 قاليك فيزا مقبولة . ياالله على. فرحة congratulations 👏🙌👏
غادي يقوليك واحد الاسبوع سير لمكتب ARAMEX باش تاخد الباسبور ديالك مطبوعة فيه الفيزا بحال الصورة ل حطيت لتحت . غادوز غا شي يامات غادي اما يسولك ميساج من عندهم او نتا من الاحسن عيط . غاتمسي لكوايزا تجيب كوعطك
الصلاة والسلام على رسول الله. مبروك الفردة بقا بينك وبين امريكا غا ✈️ ارا برع هنا غادي نصحك تبات ماتصبح ماكرهتكش تقطع الطيارة فداك النهار لايصدقوا مخرجين شي قرار فديك البلاد يديرو ليك شي كلاش مع طناش 🤣راك عارف المغرب غا على سبة . قطع الطيارة وماتلفتش من وراك بلاما ماطفي الضو .خليه شاعل اخنوش يخلصوا ...
واش نزيد نوريك شنو تابعك ولا بركة راه عييت أصاحبي بالكتابة . نخليوها تا البوسط جاي ان شاء الله تعالى
يلاه الا كان التفاعل بزاف غادي ن كمل ليكم الجزء التالي من سامحيني . وغادي تساراو معايا فالمطار وفالطيارة ونهطبوا فمطار واشنطن ولا نيويورك ونضربوا دويرة كبيرة وسط المدينة ونمشيوا نتقداو ونركبوا فالباص وبزاف المفاجات. باقي ماقلتهمش .. انتظروا ... دعيوا معانا ......وديرو لينا جيم وقليب
السلام عليكم ورحمه الله وبركاته
إرسال تعليق