نصائح للناس لي جات فيهم القرعة وجايين لامريكا:
1_خاصك تعمر ds260 بكل دقة الخطأ ممنوع بعبارة أخرى لاغلطتي غادي يتعطل عليك الموعد حيت خاصك تعاود نصيفط ليهم ايميل باش يحلوها ليك (كنقصد يحلو ليك ds) وهنا فين كايفوتك الكار الى المحطة القادمة . ملي كانقولوا ds260 كانهدروا على ضرورة توفر عنوان ديال شي شخص هنا فامريكا لي غادي يوصلوك عندو أوراقك (social security+green card) هادو هوما حياتك هنا فامريكا. هادشي علاش خاصك تقلب على شي واحد تقة ويكون ساكن مستقر ماشي كل مرة راحل. Social security هو رقمك هنا فامريكا ماخاص تاواحد يعرفوا نهائيا حيت يقدر يستعملوا ويغرقك بيه فشي كريدي+ عنداك تصوروا وتخليه فتيليفونك. خاصك تحفظوا كيفما حافظ سميتك .
2_ فهاد المرحلة غادي يخصك تبقا دخل ليوتوب وتسول وتعرف اي معلومة زايدا فيك خاصك تكون وليتي خبير فالقرعة اي سؤال تجاوب عليه . تعرف على ثقافة البلد الامريكي... القوانين... هادي حاجة لي 90٪ كايجي غا مكدم ماعارف تا خصية غا جاي. دابا غادي تكون صيفطتي ds260 وكاتسنا يجيك موعد الفحص الطبي+ المقابلة . وهادوا شي حوايج مصيرية فحياتك.
3 حبس خاصك تعرف ان النجاح ف القرعة كيعني انك فقط مؤهل باش تاخد الفيزا ماشي راك غادي 100٪ لامريكا . توقع اي حاجة تخرج ليك من الجنب خاصك تكون كتآمن بالقدر والمكتوب. من بعد ماصيفطتي كولشي غادي يجيك موعد المقابلة او الفحص الطبي. الطبيب فيلم تاهوا لا وصلتي لهاد المرحلة خاصك تكون وليتي عارف شؤون الهجرة وتكون على اتم الاستعداد وتكون عندك فلوس كافية . سطر مزيان على كافية . عنداك تمشي معلق فالطوبيس راك غاتقاسي أجواد . دير حسابك سير تسلف بيع المحامي ودير العجل دير اي حاجة المهم عوووماااار تحتك وبالزايد باشغا لي ناضت تشطح تعلق ليها.
كاين 3 الاطباء فالمغرب سبحان الله يا حليلي .لك طبيب لابس 10+. غا على سبة تبغي غاتسول يقوليك بسلامة بالاخص السكريتيرا ناري تلقا السلاك مع الطبيب وماتلقاهش معاهم . هوما مالين الشي جاب الله ماشي هوما لي كايعطيو الفيزا اما والله لا مشا شي حد . غاتاخد موعد خاصك تكون داير 2 جلبات ومابين جلبة وجلبة خاص تكون 15 ليوم. نهار يجيك الموعد لي غادوزوا فكوايزا. نصحك سير بات تما فشي موطيل باش تكون قريب القنصلية اما الطبيب هانيا ماكاين لاش تبات فكازا.
4 خاصك 2500درهم ديال الطبيب+ مصاريف الموطيل ايه موطيل ماشي اوطيل يصحابك كتبتها غلط غاتجيب معاك الملف الطبي ديالك معاك فنفس النهار اما لاكان عندك السل قوتيها ولا عندك غير شي اثر فصدرك راك غادي تعاود واحد التحليلة كادار ف فرنسا وكتاخد شهرين تقريبا لهلا يكتبها على موسطاش. يوم المقابلة هاداك هو يوم العرس هاهاهاها كايسميوه يوم الدخلة . والقنصل هو لي غادي يدحل عليك يشوف واش راك عازب ولا فايت فيك الى الزواج
غاصبر داك النهار غاتقص مزيان حيت غادي تموت بالخلعة والستريس ولكن هانيا امريكا هادي، لانجحتي غادي يقولك ايوا مبروك راك عازب نتا بالفرحة غاتخرج السروال هااااء عفوا الفيزا توريها لمالين الدار ارا برع عندك الزهر كتاب ليك عمر جديد اولد الزطاط. غاتسنا واحد 4 ايام تمشي لمكتب ARAMEX تجيب الباسبور ديالك مطبوعة فيه الفيزا. وهاديك هي الفرحة وما احلاها فرحة. تما عاد غادي يبقا يبان ليك المغرب زوين.
5 قرا مزيان لا يكون شي خطا حيت غالبا كاتلقا شي خطا فالاسم او النسب .
يلاه سير جمع الباليزات وحاول تقطع الطيارة قبل ماتقرر فين غاتمشي. شوف هنا خاصك ضبر على لي يعاونك هنا فامريكا راه غادي تجيك قاسحة بوحدك لا لغة لا فلوس كتيرة .
الطيارة غادير بيك 8 ساعات ومريحة صراحة د الله غاتحس براسك طاير بالفرحة ولكن هاد المرة حقيقة ماشي حلم . غاتوصل لمطار امريكا غايضربك واحد الغربي يا سلام النسمة حلوة . دوز عند ضابط الهجرة ومركز معاه ملي يكون كايفيريفي معاك لا يصدق غالط ليك . غاتخرج من المطار خاصك ضبر فاش تركب وفين غاتمشي . لاعندك رزقك فجيبك ماتخممش كولشي يجيك ساهل .
ملي توصل وترتاح خرج بقا تمشي للسطورات باش تشوف الناس كيفاش كتعامل . حاول طلق لسانك .سير تقدا باش تزعم . الا مادرتيش هاكا بقيتي بلاصتك أجواد حيت عمرك تعلم الحشمة والارتباك هو العدو الاول ديالك . تسنا يجييوك وراقك. عندك شوية د الفلوس صبر تاتخدم بعزك . ماتخدمش عند العرب . حيت ماغادي تعلم لا لغة ماغادير فلوس لا مستقبل . خاصك تخدم الامريكان باش تحك وتعطي الريحة .
الجو فامريكا زوين خصوصا كاين شي ولايات تا راه الجو مصفي مرة تكون الشتوة حلوة مرة الشميسة مدفية مرة الجو بارد زوين مرة التلج خفيف . المهم داكشي ديال MBC ACTION خاصك غاتكون نتا ACTION
ماتغلطش مع الناس هنا كن مادب. طلق البشرة والابتسامة. لاشفتيهم كايزربوا فالهدرا قوليهم
Please can you speak slowly so that I can understand you ?
فجميع الاحوال خاصك تفادى المشاكل و لكن عنداك شي يحد يعفط ليك على كرامتك .شفتي القضية حامضة راه كاين الشرطة . كايعطيوك وقت ويسمعوا ليك نتا هنا فامريكا عندك الحق فمترجم فاي ادراة ولا مصلحة مشيتي ليها . ماتحشمش راه حقك هاداك . حتى فالتيليفون ديما طلب مترجم باش ماتغلطش وتقول yes or no وتصدق فشي كارتة
ماتصاحب معا الا لكان شي ولد الناس نتا جاي هنا باش تغير الحالة ماشي تبقا تزها هنا فاللخر تلقا راسك بحال شي عايقين هنا 16 لعام هنا وكتيقوليك انا وانا وهو تا اللغة الانجليزية ماعندوا كايتفتف
نتا جاي هجرة يعني Green card راك قانوني ا مسيكن ماتخاف مادهش عندك جميع الحقوق بحال الامريكي فقط باستتناء حق التصويت. هو عندو الحق ونتا لا . ولكن صوت على راسك باش تنجح نتا الاول
ملي تجي وتحس براسك بديتي تأقلم سير قرأ فالكنيسة اللغة والباااااشااااار ماتبقاش خدام غا فتمارة دير شي هدف انك تقرا وتمشي بعيد واش فراسك كاين هنا لي كايشد 100 دولار فالساعة لي هي 1000درهم مغربية لاخدم 8 ساعات هي 8000درهم فالنهار قريتيها ياك شتي الحياة السعيدة كيدايرا .واشقا على راسك ماديرش بحال هاودك لي 16 لعام هنا وباقي خدام ف سطور تعدب ف الاول وتهنا من بعد ....
دوز بيرمي شري سيارة نقية خاصك شي 7 لابغيتي المليح باش ماتبقاش كل مرة خاسرة ليك فشي طريق ديما خود المليح فشي حاجة ديال الدوام .
الخدمة هنا فامريكا دخل من هنا خرج من هنا بلاما تبقا تفكر انك غاتبقا شومور لاجراو عليك . فينما دزتي غاتلقا NOW HIRING حيت غالبا هنا كافيه لي يخدم كاترشق ليه يصبح ناعس ماشي المغرب هادا . ونصيحة ماتخدمش مع شي مروكي غادي يندمك . راهم خدامين فبلاصة وحدة ومقاتلين . يجي من أمريكي ويخليك نتا ولد البلاد السم ياربي السلامة . لاعندك طوموبيل ماتخدم مع حد .خدم راسك وسير قرا اللغة الانجليزية هي سوارتك هنا.
حاول تبقا طيب كاميلة باش توفر فلوس ماكلة الزنقة حيت مصرى للصحة وجيب. فاش غادي تجي هنا غادي تبلغ بالمونادا غاتولي مدمن . حيت الشعب الأمريكي مدمن عليها، ماتنساش واليديك مرة مرة صيفط لمك .قوليه لميمة سيري جبدي. واحد البركة ماتصورش شحال مسكينة غاتفرح الا ماتهليتيش فوالديك عمرك غا طفروا هنا غاتبقا دور فبلاصتك عقل على هاد الكلمة مزيان، الرابح من الوالدين والخاسر من الوالدين.
تجنب المقاسات مع شي حد حيت ممكن يكون مسلح مثلا واحد العائلة عربية كانوا ديما فصراعات مع واحد الميريكاني على parking السيارات واحد النهار داك الامريكي جاب السلاح تيرا فيهم ب 3 فالبلاصة قتلهم الله يرحمهم. حضي راسك وراه ربي لي كايقدر عليك المكاتب اللهم لا نسالك الرد في القدر ولكن نسالك اللطف فيه، شري اي حاجة بغيتي عندك الحق تديها للدار وتردها فظرف شهر او اكتر كولشي ساهل .
هنا كاين الغالون ماشي اللتر بعني الغالون فيه تقريبا 3 تا ل 4 لتر المازووط غايجيك رخيص عادي حيت غايكون عندك مدخول طبعا.
بركة عليك قرأ بعدا هادشي ونزيدك من الفن طرب.
دعيوا معايا راه ماكاينش لي يعطيك بحال هاد النصائح.
إرسال تعليق