نصائح من القلب للاصدقاء:
فاش تجي فيك القرعة ماتمشيش تزوج ممكن تخطب مرحبا انا الزواج بالدات فديك المرحلة خطار عليك حيت القنصلية كتعتابروا زواج مصلحة
بلاماتبقا جاي مشارجي بالماكلة وقوة الدخاشش وا جواد راه كولشي كاين هنا وراه بلاد الخير غاتبقا تاكل تا غادي تخرج ليك الماكلة من ودنيك
ماتجيبش معاك شي تيليفون زوين حيت 90٪ مايخدمش ليك نتا زهرك بحال لي وقع ليا . هادشي علاش حاول تاتجي هنا وديك 3000/2000درهم تجيب ليك تيليفون مزيان تبدا به.
جات فيك القرعة ونتا مزوج وعندك وليدات غانعطيك نصيحة من صميم القلب . انت الان مخير بين جوج حوايج : لاعندك اللعاقة مزيان جيب ولادك ماتخلي حد موراك قبل ماتسالي الفيزا فيها 6 اشهر. ماعندكش فلوس كافية ها العار بلا تكرفص ولادك راك غادي ناكل العصا خصوصا لامعندكش لي يوقف معاك . شبه مستحيل تكري فالول حيت ماعندكش أوراق الخدمة وماعندكش كريدي سكور . ادن غاتبقا مكرفص فالاوطيلات لي كايوصلوا لاكتر من 1200درهم الليلة هادا غا شي حد غادي موطيل ماشي تا اوطيل
فاش يسهل عليك الله وتجي فيك القرعة غاتبغي بنت خليتك ولا عمتك تلصق ليك بنتها لي مساريا الغاية متر من الديب . لا لا سير لامريكا دير علاش تولي . وابنادم سير تهلا فوالديك الحياة قصيرة . وسعادتك بين يديهم
ماعندك مادير بشي زواج . لي بغا غايبغيك بخنونتك ماشي تا تمسحها ...
ماتقول لحد جات فيك القرعة عين بنادم يا لطيف تا واحد ماغادي يحملك . دير بحالي تا لصباح لي غادي للمطار عاد قلتها لواحد السرباي كان كايجيب ليا قهوة سبيسيال شكرتوا ودعا معايا let's go
جيب معاك طجاكيطات غلاض وشي حاجة مليحة حيت هنا غاليين صراحة .
لاجيتي هنا ونتا مبلي بشي مصيبة عمرك تحلم غادي تحيد منك هنا البلاد مغرية بزاف كولشي عندهم حلال
عنداك دور ليك فالخوا وتمشي تاخد شي كريدي ولا تمشي تسلف باشتجي راه والله لاطفرتيه الا الربا حضي راسك والله ماغادي تزيد من بلاصتك . الربا حرام وهي حرب مع الله والرسول وحشومة تفكر تاتحارب مع لي خلقك ولي غادي يشفع ليك صلى الله عليه وسلم .
عنداك ماي توصل لهنا يبقا يغريوك بالبنوك والكريديات هنا كولشي شاري الاتات والدار والسيارات بالكريدي الا من رحم ربي شي 10٪ هنا متقيين الله . رد بالك خليكزوين مع الله تعالى باش يتفتحوا ليك البيبان
ممنوع تزايد مع شي حد فالهدرا اكتر من اللازم السلاح موجود اي واحد توقع تحتوا السلاح فلهذا صبر وميك تا تعرف الوقت كيدايرا .
عنداك تمشي دير شي علاقة مع شي قاصر .هنا راك غادي للحبس لا محالة أسيدي نتا جاي تجمع الدولار باغي تزها سير تزوج ولكن تادير علاش .
شحال من واحد كايجي وكايسكن من roommate بنت . هاداك مسخوط ساكن مع بنت فاي لحظة تجيب ليه البوليس. Roommate هو انك دخل تسكن مع شي واحد مشاركين سواء بنت ولا ولد
الماكلة هنا ماعندها تاعلاقة بالطبخ .تاحاجة مابنينة ماغادي يعجبك والو غا سلك وصافي .
هنا مالقاوش لي يخدم هادشي علاش غاتبقا تلقا بلايص الماكلة فيهم شي وحدين كايقييوا.موحال تاكل عندهم هادشي علاش حاول طيب فالدار تاكل ماكلة صحية وعلى يديك
شوف هنا فامريكا بنادم مافيه لي يخدم خدام ليهم بزز غا على سبة نهدر معاه يخرج من الخدمة وةيكشي يدفع الشوماج يبقا يتخلص وهو غا جالس فالدار يقوليهم جراو عليا. بحال وحدة عيان ماتقوليهم واعباد الله جريو عليا والو ماقدروش .
فامريكا كاين قوانين كتختلف على حساب الولايات متلا كاين ولاية انك لابغيتي تخرج من الخدمة خاصك تعلم بشي جوج سيمانات باش تبقا صورتك مزيانة معاهم .حيت ديما كاتطلع ليهم فالسجل ديالك سبب الخروج . عاود كاين ولايات قانونها هو وقتما بغيتي تخرج خرج ماكين لي يقوليك تا حاجة .ورزقك يوصلك يوصلك ماتخافش.
كاين بزاف د الحلول فالخدمة عمرك طيح اومبان لاعندك طوموبيل خدم راسك تبقا ضرب تاطيح . ها العار غاتخدم .
اي خدمة دخلتي ليها شفتي راسك مامرتاحش . خرج وشوف خدمة اخرى بالخصوص لاخدمني مع شي مغربي كحل راسك يبغي يطبقها عليك . شتي لكان غاتمارة موجودة اي محل دزتي منو تلقا now hiring .
دائما خصاص مهول فالخدامة.
الشعب الأمريكي عندو تقافة زوينة هي انه كايفيق يمشي يخدم غير جيت عندو فواتير خاصو يخلصها. مهلي فراسو الماكلة هي كولشي بالنسبة ليه . عايش اللحظة كايحسر كولشي اليوم . وغدا يمشي يخدم وهي غادا. ماشي بحال فالمغرب كاتلقا بنادم غير سيكيريني وجامع 10 المليون . فاش كتسولوا كايقوليك حقا دوائر الزمان كأنه ضامن راسوا . ملي تجي لهنا ماتحرمش راسك كول شرب سافر وجرب اي حاجة ماقدرتيش ديرها فالمغرب . فوج على قلبك لانك كتستحق اكتر ...
ماتنساوس والديكم لي رباوكم وتعدبوا عليكم عادي هحي الفرصة كل مرة اقول لميمة الواليدة سيري خرجي واحد البركة . ولك ان تتخيل فرحتها قداش.
فاش غاصرب شوية هنا غاتوحش والديك غادي يطيح عليك الضيم .الفلوس ماشي هوما الحياة. ولكن لمة العائلة وخوتك ماعندهم ثمن. فلهذا جمع فلوس الطيار للسفر كل عام تشوف ناسك راه ماتعرف شنو كاين .
الناس لي جايين مزوجين عندك شي مستضيف ولا غاجاي . بلا ماتعدب مرتك واولادك فالاول . الحياة قاسية ى فالاول هنا. شحال من واحد مسيكة ماقدرش ورجع بحالوا .يصحابوا غادي يوصل ويلقا الدولار مشتت.
نهار تستقر هنا وتفكر تتزوج واياك تم واياك تزرب وتجيب شي بانضية طلع الأوراق على ظهرك . راه الأغلبية هنا وقع ليكم هاكا جابوها غا ولوها وراقها هنا قالت ليك نتا بحال خويا . حيت هي اصلا نيتهنا من الاول باغا green card باش تجيب مها
ومها دفع لباها وباها يدير تجمع عائلي .يجيب الفاميلة كاملة هنا . ونتا تبقا فاعل خير
الناس لي مزوجين الحياة هنا خاصها راجل ومرا ماشي ذكر و أنثى. الام مدرسة هنا عندها دور كبير فالتربية.هادشي علاش كون راجل وخدم 2 خدمات وخلي المرا تقابل دارها وفينما تزوهرات دور معاها .حيت باش تخدم نتا وياها اصعب شئ لكانوا الاولاد غاتندم حيت ماكاين لي يربيهم على برا . خليك من التحرر وا لا النسوية المتفتحة . جيب معاك كرا تكون حسكة عسكري ولا جي لوحدك سالينا.
ولادك هنا غادي يتداواو فابور كولشي على حساب الدولة هادي شي حاجة خاصك تحمد الله عليها ليل ونهار . بلادك الام ومادارتش ليك هاكا.
هنا كاين بزاف .دبال المنتجات صراحة كولش كاين شي. فواكه و خضر عمرك شفتيهم فحياتك . وموفرين على طول العام .
هاداك لي كايقوليك امريكا مابقاش فيها والو . قوليك اش باقي كادير تما نتا .
المغاربة هنا غامشتتين, لامولفتيش هنا ادن الديفو فيك .
لاعندك اللغة الانجليزية+ المستضيف+ سكن+ سيارة هادو هوما الحلم الامريكي انتهى .
. هاد النصائح شبه مستحيل تلقاهم حيت شي ماحامل شي .
اخوكم انوار كيسلم عليكم . كالعادة خليو دعيوات د الخير هنا . راه ماندير مجهود كبير باش نفيدكم ونرفع ليكم المعنويات ادن كنستاهل دعاوي د الخير
إرسال تعليق