شهرين فامريكا المهاجرين الجدد شي حوايج هنا فامريكا نعطيكم عليهم فكرة باس تعرف راسك فين جاي امريكا او الحلم الامريكي صراحة هو حلم الملايين حول العالم علاش زعما ؟!! امريكا ماشي بحال الافلام وداكشي ديال Action هي فعلا طريق معبدة نحو مستقبل مشرق لكن البداية خاصها تخطيط وصبر ومثابر ملي غاتجي لامريكا اول يوم تنزل من المطار غاتحس باحساس غريب غادي تخلط ليك مشاعر الفرح مع شيء اخر شناهوا مانعرف 😛. غادي يبان ليك الناس منظمة والابتسامة لا تفارق وجههم . غاتبقا تشوف فشي حد يضحك ليك فوجهك بدون شعور . هنا غاتفكر فاش كنتي في فالمغرب بنادم مخنزر فيك وماحملكش على والو
علاش غادي يعجبك الحال فامريكا :
امريكا فيها الخدمة ماكينش التمييز بين الجنس والعرق واللون والعمر غادي تخدم مع ناس مخلطة لا كنتي معاق غادي يخدموك لاكنتي كبير فالسن غادي تخدم كاين هنا لي فايت 65 عام وباقي نشيط وكايدير خدمة ديال 2 شباب فامريكا الجو من عند الله زوين الشجر بالالوان . الفصول الاربعه كلهم كايدوزوا فالوقت (فغالب الولايات). بنادم قليل او شبه منعدم تلقاه كيتمشا على رجليه ماكاين غا السيارات . الحدائق منظمة
فينما مشيتي كاين الويفي فاي بلاصة كتخيل
فامريكا كاينة واحد الحاجة غادي تصدمك هو انك متلا تقديتي شي حاجة من اي STORE متلا وماعجباتكش يمكن ليك تديها للدار وتقدر كاع تستعملها ايام وتردها ليهم يعطيوك رزقك واخا تكون حليتيها وتلفتي كارطونتها (الناس هنا كايديرو فيك التقة العمياء لدرجة كاعما كايقلبوا السلعة لي رديتي ليهم واش خدامة ولا لا)
تم كاينة حاجة غريبة متلا شريتي دلاحة وديتيها للدار وصدقات ماشي حلوة راه يمكن ليك تردها ليهم ويعطيوك رزقك 😛😛 ولا متلا شريتي شي مشروب وماعجبكش تردو تا هو واخا شربتي منو 😁
السياقة ساهلة جدا والشوارع كبيرة وعريضة البيرمي فامريكا ف غالب الولايات كاين ب 3 اللغات (العربية الانجليزية الإسبانية). كادوز الكود فيه 25 سؤال خاصك تنجح ف 20 . وملي تنجح كاتخلص 21 دولار فقط . وكايعيطوك رخصة السياقة مؤقتة فيها 3 اشهر يمكن ليك تسوق بها ولكن خاص يكون راكب حداك شي حد عندو رخصة السياقة. وملي تقرر تمشي دوز انا تكون شريتي طوموبيلتك باش دوز بها أو صبر فشي وحدة اما تكريها او ديال شي حد كتعرفوا (وهنا خاصك تقطع ضروري لاصورانص باسمك )
شوف هنا عقلية متقدمة كايطغى عليها طابع التقة . حيت هنا كايتيقوا فيك لواحد الدرجة لا تتصور
(ادن كن اهل التقة)
القانون هنا صارم ممنوع الغلط ولا تسب شي حد ولا تغازل شي وحدة او ترمي الزبل فالزنقة ولاتمشي بسرعة كبيرة . حيت كاين هنا لي عندو السلاح بحال شريب الما يقدر مايعطلكش... ولكن متخافش هادشي قليل الى كنتي داخل سوق راسك
الشعب الأمريكي شعب وكال فينما دور كاين مطعم المطاعم اكتر من بنادم . تلفت اليمين تلقاهم كايقصيو تلفت اليسار تلقاهم كياكلوا.95٪ من الناس هنا كتاكل من Macdonald و fast food حيت الغاز باش يطيب غالي كايقوليك اللهم ماكلة الزنقة . والوقت والو
البداية غاتجيك قاسحة الا مانعندكش الفلوس بزاف . نسى عليك العقلية د البلاد . غادخل تسرب قهوة تحط 40/50درهم لي هي 4 او 5 دولار .خاصك واحد شهرين لفوق باش تأقلم مع الدولار.
اول خلصة ليك فشي خدمة غاتاخد شيك غاتفرح بزاف حيت اول مرة تشد الدولار ضارب عليه تمارة
هنا فالبنك ماتحتاجش دخل عندهم باش تصرف شي شيك لالالالالا فقط كادخلوا من كالكيشي وكايدخلوا مباشرة للححسابك الفلوس
شتي هنا الناس ميسرة لواحد الدرجة لا تطاق ديما كايقولوا ليك هاك خود غير الساهلة
الا ماكننيش كتكلم الإنكليزية راه من حقك فاي إدارة طلب مترجم .غا هو تيق بيا اللغة الانجليزية غادي تشكل ليك واحد العقدة مانعاودش ليك العداب
خليك تاتجي ورد عليا
فاش توصل سير apply على Medicaid لي هو التأمين الصحي ديال ولدك لا عندك الأولاد + food stamps هي الماكلة كاتعطيك الدولة بطاقة تبقا تشري منها الماكلةهلى حساب شحال عندك من ولد (كاين لي كياخد تا ل 1000 دولار مليون مغربية ) بيدما توقف على رجليك هاداك غا رزقك حيت هنا غادي يفركعوك بالضرائب .الدولة كتعتامد على TAX 90٪
بغيتي تشري غا دانون غاتخلص نصف القيمة ديالوا TAX
الطوبيس حاليا فابور فبعض الولايات وفيه الويفي والكليما ويمكن تهز فيه بيكالتك كتحطها القدام
داكشي علاش قلت ليك الناس ميسرينها عليك.
الا جيتي لامريكا ماعندك متكبر بشي صحاب .شقا على روحك ا عز الدين جمع ودير علاش ترجع . باش نفعوك الصحاب فالمغرب .
عنداك تكون غادي فالزنقة وتعجبك شي شقراء وتنك عليها( راك عارف العمبوكة تنادي ). بعد من القاصرات اقل من 16 العام راه الحبس بعينيه .
هادشي كتبتوا ليك من القلب دعي معانا ومرحبا بيك ف ميريكان اخوكم انوار السلام عليكم ورحمه الله وبركاته
إرسال تعليق