دفع للقرعة و لكن عيش حياتك خدم -قرا و الا جات ديك ساعة مرحبا

 ليوما جيت نعاود لكم على الحلم الامريكي ، انا فعمري حاليا 29 سنة و مني كانت عندي 14 سنة غادي يبدا عندي الحلم الامريكي ، فصيف سنة2008-2009 غادي يرجع خالي من امريكا و انا نبدا نسول فيه اشنو هيا هاد امريكا بقا كيعاود ليا على كيفاش كيعيشو تما و الامريكان كيفاش كيتعاملو لدرجة حبب ليا هاد امريكا ، وسولتو كيفاش مشا هو ، غادي نعرف بلي جات فيه القرعة الامريكية من اول مرة غادي يدفع و كانت سنة 2000

وقال ليا مني تاخد الباك ديالك بدا دفع ليها ، في سنة 2012 خديت الباك و بديت كندفع 

سنة 2013 كانت اول سنة غادي ندفع و مني وصل شهر 5 كنت متفائل بزاااف كأي شخص كيدفع لمرة لولة ، مني علنوا النتائج كنلقى رسالة لمشؤمة 

has not been selected

بقا فيا لحال وخا هكاك بقا الحلم الامريكي معايا سنة 2014-2015-2016-2017-2018-2019-2020 كنلقى نفس الرسالة 

حتا لسنة 2021 بديت كنقرا اللغة الالمانية و درت تكوين مهني فألمانيا و مني مشيت تما دوزت عام ديال لقرايا و لخدمة و دفعت فيزا سياحة لأمريكا و عطاوني فيها 10 سنوات و مني مشيت لأمريكا تزوجت وقاديت الوضعية القانونية ديالي وحاليا انا فأمريكا و كنعيش الحلم الامريكي 

من هاد القصة ديالي بغيت نوصل ليكم بلي القرعة الامريكية الفوز فيها كيبقى ضئيل جدا و لواحد ميعمرش بيها راسو و يعول عليها بزااااف حيت غادي يبقى كل سنة كيتصدم 

دفع ليها و لكن عيش حياتك خدم -قرا و الا جات ديك ساعة مرحبا و ثاني حاجة كاين بزااف الحلول باش تمشي لأمريكا من غير القرعة مثلا تمشي تخدم فالخليج بعقد عمل و بعد سنة او سنتين دفع فيزا سياحة لأمريكا مهم كاين بزااف الطرق باش تمشي لأمريكا خاص غير الصبر ثم الصبر و الله ولي التوفيق و الله يسهل على الجميع