عدنا هاد المرة بناءا على عدة طلبات ديال الناس لي كايسولوني نفس الأسئلة. غادي نحط ليكم هاد البوسط خاثر بالمعلومات لي يقدر خوك مايقولهمش ليك . سير جيب شي دكة وقرا مع راسك .هادشي لي غادي تسمع هو لي غادي تعيش وغادي تكون عندك فكرة مسبقة باش تعرف كيفاش غادي تضبر امورك فالبداية لان البداية هنا هي كولشي . لا ماقدرتيش توقف على رجليك فالاول او بالأحرى الى ماعرفتيش الطريق لي غادي تسلك ف رااك امسكية غاتبقا دور فبلاصتك وغادي يطلع ليك الدم وتبقا تقول. واااع واش هادي هي امريكا لي فضحونا عليها. هاد البوسط غادي يكون غزير بالمعلومات والحقائق لي تصدم بزاف ديال الناس . البوسط فيه تعليمات وحقائق غادي تعيشهم على طول العام الاول
- الفقرة الأولى فيها كيفاش غادي دير تسلك راسك فاش يلاه تنزل من المطار بالنسبة للعزري ولي مزوج
- الفقرة الثانية فيها كيفاش غادي تقلب على بداية الطريق
- الفقرة التالتة فيها كيفاش غادي تحاول دير بلاصتك هنا.
واجدين ارا داك الباب اللور احسن
شحال من واحد كايسحابوا غادي يجي من الطيارة يلقا الفلوس مشتتة تا كايتصدم بواقع قاصح واقع باغيك تكون SMART ماشي HARD وراه كاين فرق كبير بين هاد جوج كلمات خاصك تأمل فيهم مزيان . هنا خاصك تكون دكي ماشي قوي داك التحوفير ديالك خليه فالمغرب . حيت خاصك تعرف منين كايتكال الكتف ماشي كيفاش غتاكل هاد الكتف .
العزري جاي من المغرب نزل فالمطار بانوا ليه الضواو والزعرات و الجو مبهج. ارا برع عتقك الله ونقزتي الى الضفة الأخرى
* لي فات البحر لهيه كاتصدق ليه *
بلاتي بلاتي رجع رجع هادشى ف 7 ايام د الكرموس.
هنتا وصلتي ورتاحيتي !! شنو الهدف ؟ شنو نوع الخطة لي غادي تلعب بها فامريكا ؟! عندك شي هدف ولا باغي غاتبقا تحوفر فالريسطورات والسطورات ؟! انا غادي نعطيك السيناريو ديالك .هاد الفيلم هو لي غادي تعيش القصة ديالو .
اكيد فالاول بنادم غادي يبغي يخدم فاشما عطا الله. واخا غادي تخدم ب 14 /13دولار أسيدي 15 كاع مرحبا انا نزيدك دولار كاع. نتا كواحد عاد داخل للخدمة بدون تجربة وبدون لغة غادي يعطيوك PART TIME لي هو من 3 ساعات الى 30 ساعة فالاسبوع. والاسبوع هو الخدمة ديال 5 ايام هنا فامريكا .
بمعنى ان الحد الاقصى القانوني فامريكا هو 40 ساعة و هاد 40 ساعة كتسمى FULL TIME وكاين عاود ل OVER TIME لي هو اكتر من 40 ساعة ولي كتعتابر غير قانوني بالمؤسسات لي غاتخدمك قانوني .
نرجعوا عندك امسيكة نتا بوحدك غاضرب 30 ساعة
30ساعة×14دولار = 420دولار
420دولار هي لي غادي تشد فالسيمانة لي غاتكون خدمتي فيها 5 ايام يعني غاتخدم غا 5 ايام هنا او اقل على حساب كيفاش مقسمين ليك ديك 30 ساعة . كاين لي كايطحنها ف 3 ايام كاين لي ف 4 ايام كاين لي ف 5 ايام على حساب MANAGER كيفاش داير .
قلنا غاتبقا ليك 420 دولار . اراك دابا الطاكس وما ادراك ما الطاكس لي هو الضريبة . نتا كعزري غادي يشنشطوك مزيان . ماشي بحال واحد مزوج. غادي يديو ليك واحد 120 بكل روجولة من ديك 420 . شحال غاتبقا ليك ؟؟!
300دولار ياك . هادشي لي غادي يبقا ليك خاصك تكون داير التأمين الصحى فالخدمة لي مهم . حيت لامادرتيش التامين هنا فامريكا كتصحك :
تاتكون فيك الموت عاد سير للسببطار
حيت هنا مع الدخلة د السبيطار غاتكون حطيتي واحد 3000دولار وسول مع راسك .نرجعوا عندك العزري التأمين خاصك فيه واحد 50 تا 60 دولار فالاسبوع.
هاااا ايوا اش بقا اخاي ليا انا !!؟؛
باقي الخير غاصبر غادي نقوليك كيفاش تبقا تجيب التعادل ولا تربح كاع .
غاتبقا ليك واحد 260 دولار فالاسبوع الى غالبا بخدمة وحدة غادي يوقع ليك هاد السيناريو المحتمل جدا .
هادو هوما الاقتراحات لي غادي يطيحوا ليك فبالك وغادي ينصحوك بيهم علماء امريكا المغاربة. لي كايفهموا فكولشي
* ايوا اكيد غادي تخدم جوج خدمات *ايوا غادي دير اوبر او دوراش باش تكمل به ايوا ايوا ايوا .
نتا كمهاجر جديد اكيد ماغاديش تكون.عندك سيارة اكيد ماغاديش يعيطوك Flexible schedule متلا تقدر تخدم من 9 ل 5 او من 10 ل 7 وفهاد الوقت صعيب تلقا شي خدمة اخرى لان هدا كيتسمى وقت الدروة يعني أي خدمة تبغيك قبل من هاد الوقت . وبالاخص نتا جديد خاصك وسيلة نقل باش تمشي لهاديك الخدمة التانية الا لقيتيها وهنا غادي طيح فالارهاق والتعب. وحاول على راسك يعني خاصك حتى تاخد FULL TIME عاد تقدر طلب من MANGER يدير ليك توقيت محدد باش تبقا تخدم جوج خدمات . فهاد الفترة المصاريف ديالك غادي يكونوا بحال هاكا. فلوس الكرا والماء و الضو لي غالبا غادي تكون كاري بيت مع شي قشلة د البشار وخاصك تصبر هادشي عادي نوعة ما.خاصك فلوس الاكل لي غالبا غادي تكون كتاكل غا فالزنقة ( فين هوا الوقت باش طيب شي كاميلة )خاصك فلوس طرونسبور بالاخص لكنتي فشي ولاية محشرة خاصك ضروري Uber باش توصل لخدمتك لي غادي يخصك فيه واحد 30 او 25 دولار easy,خاصك باش ترش الواليدة يصحابك قطعتي الواد ونشفوا رجليك عقلتي نهار كانت كتحيدها من فمها وتعطيها ليك عقلتي نهار باك كايفيق فالشتا والبرد باش يجيب ليك ماتحنجر . ماديرش بحال هادوك لي ناسين والديهم . والله اوليدي لا طفرتيه وماتهليتي فباك ومك عقل عليا مزيان . هنا غادي تبقا تقول اواه تاكيفاش اخاي هادشي كامل ايوا اش غادي يشيط ليا ؟ وشنو غادي نخبي ؟ ياك امريكا هادي والدولار موجود.نعم امريكا هادي وكاين مايدار لا مقارنة مع المغرب بحال كوكب المريخ مع الارض . الاول مافيهش الحياة والتاني فيه . ولكن راه البداية أصاحبي هادي . واش نتا باغي تجي تلقاها واجدة والفلوس مشتتة . داكشي علاش قلت ليك خاصك تخدم SMART NOT HARD.
دابا انا غادي نبدا نحيد من لحيتك ونرقع ليك باش عالله وعسى تربي شوية د الريش ويبان فيك الضو الا كنتي دكي غادي تعرف ان سوارت النجاح بين يديك خاصك تكون فنان فاستغلال الفرص. وخاصك تكون عندك هاد العقلية الي غادي نقوليك نتا ماجايش لامريكا باش ضرب الكرفي وتمارة. وتبقا خدام فريسطورات وريحة المرقة فيك والفريت لا أصاحبي نتا انسان محظوظ جابك الله هنا حيت بغاك طور الحالة وتغير الحال. ادن خاصك تخدم بعقلك وتستغل الفرص . المغرب فيه فرصة وحدة لي هي هادي لي عطاك باش جييتي لامريكا . اما امريكا فيها المغرب كامل باش تجي للمغرب . ايوا عاود قرأ مزيان هاد الجملة لي قلت ليك .
نتا خاصك تخدم وتمشي تقرا ملي كانقول تقرا هو تمشي تقرا اللغة الصكع باش تعرف كيفاش تحل البيبان الاخرى لي عندك . ماتسوقش للدولار فالاول راه كولشي غادي يجي مع الوقت ولكن باش غادي يجي ؟ بالتحوفير فالسطورات والخدمة مع العرب ؟ NONONON . امريكا هي الدراسة هي دبلوم هي تكون فنان فاللغة . عرفتي شناهيا تكون عند واحد فبلادو وكتعطيه العصير باللغة ديالو . تاراه هادا حلم بالنسبة ليا وانا كنكتب هاد البوسط . اللغة اخويا مانقدرش نوصف ليك اش كنسوى هنا . خليك تاتجي وتيق . هاد السيناريو لي عاودت ليك غادي تعيشوا ف 6 اشهر الاولى او اكتر على حساب شكون نتا . واش دكي ولا ميكي . واش عارف بلي كاين هنا لي فات العام الاول وباغي ماعندوش تا بيرمي !!؟. واش عارف هنا كاين لي عندو داك البيرمي وماقادرش يسوق ف highway لي هي autoroute علاش ؟ حيت خايف ماعندوش التقة فراسو . سامع الناس مسكين كاتقول واع السياقة فالطريق السريع واعرة . لا مانقدرش نغامر . لا الشريف خاصك تغامر ومن هنا نستنتج انك ماخاصك تسمع لكلام الناس. راه هنا كل واحد وتجربتوا .كاتلقا شي تجارب والله تاغادي يهرب ليك . الناس راه كلات العصا فالاول هنا . وانا نيت لا جيت نعاود ليك حكايتي هنا غادي تشدك الشقيقة ومع دلك الحمد لله المهم راه سكلنا منها.6 اشهر التانية غادي يولي عليك او بزز منك تكون عرفتي راسك فين غادي وشنو كادير هنا. لامولفتيش راسك فهاد المدة راك غاتولي بحال 10000 واحد هنا 16 لعام وباقي خدام ب 12 دولار للساعة وفنفس الخدمة هادا هو الحماق.
العام الاول لكنتي ماضي ناضي غادي تعرف لاش جيتي لهنا. و شنو باغي من هنا فامريكا. العام الاول خاصك يكون عندك بيرمي وتكون كاتسوق بطلاقة . وتكون عندك سيارة ديالك ملكك بلا كريدي. وتكون حفظتي طريقة سير الادارات العمومية. وقوالب الابناك . والمهمة هي انك بديتي كورسات تعلم اللغة الانجليزية خاصك تكون مسجل فشي مدرسة ولا كنيسة ومايكونش عندك الخوف من اللغة ماشي بالضرورة تكون كتفهم لا. خاصك تكون غير قادر انك توصل المعلومة بفمك وتكون قادر تفهم ولو 60/ من هاداك لي كايهدر معاك وخاصك ملي تبغي تجاوبوا تكون متمكن انك تجاوبوا ب النطق الصحيح La prononciation correcte ديالو .ماتعلمش ديك الانجليزية ديال بن احمد. لالالا خاصك تشد مربط الفرس من المكان الصحيح . حيت بداية تعلم اللغة هي اول خطوة للتمكن فيها. وعقل مزيان اللغة الانجليزية لغة تكتسب ولا تدرس خاصك تحك مع امريكي باش طلع ليا ديك ACCENT الحلوة . من بعد عام اكيد غاتكون حافظ الغابة كتر من الديب غاتولي تقلب على community college وضرب ليا لكلاصات شوية غادي تسالي من هادشي تولي كتقلب عاود على الصح والمعقول اراك عاود للجامعة و للكلاصات الخاترين. وزيد وزيد. تدكر مزيان هادشي ماغاديش يجي صدفة . خاصك ضرب عليه تمارة باش ترتاح وتريح ولادك فيما بعد قبل ماتاخد الجنسية خاصك تكون وليتي كتهدر اللغة الانجليزية بشكل سلس .وتكون عرفتي قوانين ديال البلاد لي غادي تولي جزء منها .وتكون جالس على شي دبلوم كيفما كان .
انا فهاد البوسط جاولت نحطك فالواقحلم الامريكي اييه راه كتبتها صحيح ماشي غالط (فالواقحلم) وهي اختصار لكلمة وقع+حلم . واقع لي غادي تعيشوا فالاول وخاصك تقبلوا وحلم لي غادي تعيشوا كذلك وغادي يعجبك الحال به
فالبوسط جاي ان شاء الله تعالى غادي نحط واقع واحد جاي مزوج وشمو تابعوا وكيفاش يسلك راسوا .
وراه العبرة هنا فامريكا بالبدايات ماشي بالخواتيم
لا قريتي دغي معايا راه عطيتك الاصق وجيتك من اللخر ماعندي تا رباح فهاد الشي بغينا غا رحمة الوالدين وسير تا نتا الله يجيبك فالصواب
إرسال تعليق