جيت نجاوب على بعض الأسئلة كتكرر بزااف بخصوص القرعة الأمريكية والحلم الامريكي منها

لافامي عدنا مع بوسط جديد وهاد المرة غايكون فيه من كل فن طرب شحال من واحد سولني بريفي نفس السؤال ونا غانجاوب ونزيد من عندي نصائح بحال ديما عمرك تلقاها عند شي حد داكشي خارج من هنا  

واحد السؤال غبي كايتطرح بزااف كيقول لك حق لا جا case number حروف راه مضمون غادوز المقابله وراك ناجح وكذا تخربيقات بحال هذا الشيء شي واحد شد هذا البوسط زوق عليه وحطو للفيسبوك ومع الناس نيه كل شيء كا ثيق هذا الشيء واش من نيتكم اصاحبي راه خاصك تعرف بان هذه البلاد ما فيهاش القوالب وهذاك الكمبيوتر اللي كيعزل الناس راه داكشي كيكون عشوائي الا جاءت فيك صافي جات فيك تستحقها ما جاتش فيك بلا ما تبقى تسنى الاسئله الغبيه بنادم يخدم عقلو. 

السؤال الثاني او الاشكال الثاني هو الخدمه ملي غنجي هنا لامريكا فاش غادي نخدم بطبيعه الحال فاش غادي تجي لامريكا راك جيتي لدوله أخرى و ثقافه اخرى ناس مختلفة ربي نجاك من القوم الظالمين غادي تجي تخدم في اي حاجه اي خدمه غادي تبدا بها نعطيك الخدامي اللي غتبدا بهم  

غادي تجي غتمشي تسنى بيدما يوصلك السوشل السكيوريتي SOCIAL SECURITY والكرين كارد كتمشي تخدم في شي ستور بحال WALMART ولا ALDI ولا شي RESTAURANT ولا اي حاجه ما حدك خدام انت وكاتجمع شوية باش توفر الشيكات لانك بهاذوك الشيكات باش اتقلب على الكرا 

انت مهندس في المغرب ولا طبيب نساعلك هنا غاتعاود من الزيرو.  

الاشكال الاخر هو هذوك البنات اللي كيبقاوا يسولو حقا محجبه انا كندير النقاب هنا ماكاين لا محجبه لا نقاب لا والو الناس كتعامل معك سواسيه اذا كنتي كتهدر باللغه مزيانه يبقى يرفعوا لك القبعه يحترموك فهمتيني لانك تكون ذيك الساعه كتعرف كيف تدخل وتخرج ما عندكش اللغه غيحترموك فنفس الوقت وكاتخدم خدمه عاديه

في امريكا السوشل السكيوريتي هو انت به كتخدم به كتخلص الفواتير باش كيخدموك به تدير به اي حاجه خصك تكون حافظو وما تكتبوش في التليفون وما تعطيه حتى لشي واحد وملي تبغي تقلب على مستضيف خاص يكون شي واحد تيقة باش ما يحلوش ويقلبوا ولا شي واحد يلعب لك بيه. واذا مشى لك راه مشات لك حياتك هنايا هو كل شيء خصك تكون حافظو وكاتطير فيه وما يكون عارفو حتى شيء واحد واخا يكون اخوك 

ملي توصل لامريكا خاصك طور راسك العام الاول ما تبقاش تسنى فين غتجمع الفلوس العام الاول يلاه غتعرف القوالب تعرف كيفاش السياقه كيفاش دايره الدنيا تعرف كيفاش منين تدخل ومنين تخرج تعرف الناس . تبدا تتعلم شويه اللغه وتطلق لسانك وخليك من ذوك الناس اللي يقولك واش يمكن توفر 1000 دولار ولا 2000 دولار هذوك مساكن مافاهمين والوا فهمتيني جيتي هنا تهلا في راسك في العام الاول خاصك العام الاول يدوز عندك زوين تهليتي في راسك عرفتي الستورات فين كاينه عرفتي الطريق حفظتي الناس كل شيء درتيه العام الاول عندك الحق تمشي تقرا الدوله كتخلص عليك ٪100 وكتعطيك شي حاجه ديال الكاش باش تديريها في جيبك باش تعاون بها 

 مثلا دابا نفترضوا هنايا الدوله عاوناتك ب 20 مليون غاتبقا ليك مليون ونص كاش كديرها في حسابك تمشي تدير بها شي حاجه هذا الشيء خاصك تفكر فيه ملي تكون ضربتي العام والا بغيتي تدير هذا الشيء مع الدوله خصك تكون ساكن عام في نفس الولايه ما تحركش منها تبقى ساكن فيها.  

انا كنصحك هنايا ما تلعبش مع البوليس لانهم مسلحين ديما ومكيتعاتقوش راه غير تدير شيء حركه يجبد معاك مثلا الا كنتي سايق بحال هكا وقفك شي بوليسي خاسك تكون عارف القانون السياقه اللي هو انك خاصك تهبط المرايا شويه وتبقى شاد يدك على البولا ما تحركش يدك ما تهبطش وما تحركش ملي يكون كايهضر معاك من برا حيت لادرتي شي حركه او بغيتي تجبد شي حاجه يقدر يتيري فيك في البلاصه خاصك تكون عارف القانون ديال امريكا قبل ما تجي ما تكونش جاي مدمدم.  

النجاح في في القرعه ما كيضمنش انك راك صافي غتجي الميريكان كيضمن انك فقط مؤهل باش تاخذ الفيزا انت مؤهل فقط وليس مضمون لذلك شحال من واحد وصل تا لعند القنصل ورفض ليه الفيزا لاسباب مثلا صحيه اولا طلب ليه داك الاستماره ديال 134I ولا مقنعوش بهضرتو لهذا خاصك تكون كتامن بهذا الشيء النجاح في القرعه لا يعني انك غادي تجي لامريكا مئه في المئه انك فقط مؤهل باش تاخذ الفيزا. 

عندك يصحابك غادي تجي غتلقى الفلوس هنا مشتتة ولا غادي تبقى تلقى كل شيء موجود.ايه اتلقى هذا الشيء هذا فعلا اذا ضربتي تماره الناس كتفيق مع 7 د الصباح وكترجع مع 6 د العشيه مهلوكه هذوك اللي كيقول لك حقا غتخدم جوج خدمات ولا ثلاثه غير مساكن حيت محروقين دابا جالسين بلا خدمه ملي غتجي اذا ضربتي خدمه فيها 10 سوايع راه تجي كاو غتجي غتبغي تاكل وتنعس دودة وكتفكر بان الغد ليه عاود تفيق مع 7 فين هو الجهد تخدم الخدمه التاليه لهذا الخدامي العادييين ماغاطورش راسك بهم انت خدام دير شي بركه تحتك وسير تقرا وعقل عليا الانجليزيه هي انت في ميريكان.  

الحاجه اللي خلاتنا جينا لميريكان وعايشين مزيان هي الراحه النفسيه ماشي بحال المغرب هنا الناس سواسيه كيعطيوك حقك اذا كنت ما كتهدرش بالانجليزيه كيجيبوا لك مترجم اذا ما عجباتكش شيء حاجه ممكن تردها ويردوا لك فلوسك بلا صداع بلا مشاكل واخا تكون لبستيها هنا الناس ضريفين ديما مبشورين وتيضحكوا معك الجو ملائم وبيئة ملائمه للعيش ماشي بحال المغرب كتفيق كتلقى بنادم مخنزر فيك ما حاملكش على والو انت انت مقوده عليك وهو مقوده عليه وما حاملكش. 

انا كنصحك مزيان فاش تجي فيك القرعه وتعمر دي اس خاصك تركز على ثلاثه الحوايج المستضيف واللغه والفلوس اللي غتجيب معك هذو ديما نعاودهم في البوستات ديالي لانهم مهمين وركز مزيان واعقل على هذا الشيء هذا الثلاثه ديال الحوائج غادي تتبهدل كاين اللي كيجي قلت هنا شهر شهرين وما كيلقاش الخدمه ماشي كيف ما كتصور امريكا اعطيها باش تعطيك. 

باش كتعجبك هذه البلاد هو كولشي سواسية والقانون كيسير كل شيء 

كل شيء غادي مع الخط تعواج بحال هكا ولا بحال هكا يطيروك فهمتيني ما تغلطش الا عندك اللغه وكتعرف كيفاش تهضر يوقف قدامك بوليسي تشطحو غير باللغه ديالك فهمتيني بلا لغه بزاف ديال الحوائج الزوينين غادي يفوتوك وعقل مزيان شحال من مره كنعاود لك اللغه 

اذا كنتي سايق هنايا كنصحك ما تخدمش الكلاكسون بالزاف كاينين ناس مريضة نفسانيا شحال من واحد خدم كلاكسون خرج لي واحد ب فردي تيرا فيه فهمتيني خص تكون عارف هذا الشيء مزيان السلاح هنا مهم وتكون حاضي راسك وما تمشيش للتجمعات اللي كيكون فيها بنادم كثير ولا شيء مهرجان تا الا مشيتي ارجع اللور حيث تما كا يوقعوا الارهاب والتفركيع وذاك الشيء. 

الاقتصاد الامريكي هو اول اقتصاد في العالم الخدمه موجوده وهذا الشيء كيعني انك كمواطن هو كل شيء بالنسبه لهم كيحترموك مثلا مشيتي شريتي شي حاجه كيعطوك 90 يوم باش تاخذها ولا ما عجبتكش تجي تردها بلا ما يصدعوا معك راسهم ماشي بحال المغرب يبقا يقلب فيها هنا كتجيب الحاجه كتردها فالبلاصة كتجيب معك الروسي باش شريتيها يردوا لك فلوسك و كتخرج بحالاتك اي حاجه شريتيها 

حاجه زوينه في هذه البلاد هنايا. 

خاصك ملي توصل لهنا تعاشر مع الناس تعرف اكبر عدد من الناس باش تعرف القوالب وبقا تسول ودير راسك ما فاهمش دمدومه وخليهم يقولوا اللي بغاو يقولوا المهم انت كتجمع في المعلومه حيث المعلومه هنا مهمه وما غتلقاش اللي يوقف معك ويبدا يوريك في الاول وشحال من حاجه بحال اللي كنكتب فيه انا دابا تا واحد 

ما يحط لك بحال هذا الشي و يبقى يكتب بحال هكا.

بنادم مايبغيش ليك الخير.  

واحد المده خدام في نفس الخدمه وتخدم مع العرب ما تبقاش تطور اللغه ديالك وما تعرف شنو كاين وما تعرفش القانون لا خاصك تجي لهنايا تبقى ديما تهز التليفون ديالك تهضر مع customer service بحال هكا شي خدمه باش تطلق لسانك باش تعرف كيفاش الناس كتهضر ديما اطلق التليفون ديالك في ودنك وشوف ناس كيفاش كتهدر باش تعود لسانك على اللغه والا لقيتي شي خدمه فيها غير العرب ما تخدمش فيها اذا لقيتي بالضبط المغاربه ما تخدمش معهم حتى السلام عليكم ماكيردوهاش. 

الصحه هنا غاليه بواحد الشكل لا يطاق هذا الشيء علاش انا كنقول لك قبل ما تجي لهنايا نقول لك شنو غادي تدير غادي تمشي تدوز على اسنانك كاملين اتنقيهم كاملين شو شنو غادير ليهم ولا غتعمرهم هذه اول حاجه ثاني حاجه تدوز على عينيك اذا كنتي كادير النظاظر جيب معاك شي جوج نظاظر من المغرب ولا ثلاثه ثالث حاجه غتدوز على عينيك تدوز عن طريق اختصاصي رابع حاجه دير تحاليل ديال الدم كاملين باش تعرف ايش فيك مرض ويش عندك شي حاجه باش تجي مرتاح من هنايا ولا لقيتي عندك شي مشكل جيب معك الدواء جيب معك الدواء جيب معك الدواء هنا راه غالي راه كدخل السبيطار كتقول ليهم السلام عليكم يقول لك عندك جوج د المليون.  

لكنتي مزوج عفط وجيب معاك مرتك و اولادك خليك من ديك الهدرا ديال جي بوحدك بيدما تستقرلا أسيدي جيب معاك كولشي فراسك على وجه ولادك غادي يحتارمك كولشي وغادي يعاونوك الناس هنا مزيان والدولة غادي تهلا فيك . 

راه واخا تعيا ماتخطط اينا ولاية فين غانجي ماغاتمشي غير فين مشاك الله . ماتمشيش ل نيويورك او سان فرانسيسكو او كاليفورنيا او بوسطن حيت عمرك تربي الريش فيهم .غاتبقا تفيق وتخدم غاباش تخلص الكرا وتاكل .  

لاكتعرف شي بنت الخير والجود الرجولة جيبها معاك مافيها باش لكانت مضحية معاك تجيبها تغير الحالة تا هيا . اما تقوليا غاتجيب شي وحدة ماكتعرفها ماوالوا فراه غادي ترد ليك ظهرك رطب من كرشك . 

لي غايجي لامريكا ب فيزا سياحة. وكايفكر يحرقها . هاداك هو اكبر قالب غاتهز حياتك كاملة. امريكا اصعب واعقد دولة تقدر تصايب فيها وراقك .  

هادا السيناريو هو لي غادي يوقع ليك الا عندك الجواب ديال هادشي لي غادي نذكر ليك فمرحبا حرقها ..

بلا اوراق فامريكا عمرك تخدم قانوني تا حد مغادي يخدم فقط العرب هوما لي يحرتوا عليك ب 10 دولار 

عمرك تحلم تكري عمرك تحلم تصايب شي ورقة كيفما بغات تكون .غاتعيش العداب عمرك تحلم ترجع تشوف والديك شحال من واحد حاصل هنا ورجع بحالو  

اللهم فكر مزيان بلاما تينا المونديال ديال امريكا 2026 حيت هادي دولة ضابطة امورها وهي لي كتحكم ف الفيفا. عارفة غايتكب عليها العالم كامل ولهدا غاتكون شروط تعزيزية المشجعين .وراه كاع العالم منظم ف 3 دول. المكسيك و كندا او امريكا . وغالبية المباريات الأفريقية غايتلعبوا فالمكسيك  .  

كان هدا بوسط مخلط نصائح من تجارب محارب هنا فامريكا بغيتي دير بيهم هانتا ناضي مابغيتيش انت حر تحمل مسؤوليتك راه امريكا فيها 350 مليون واحد وراها قارة كل ولاية قدها قد المغرب ديما كاين الخصاص فالخدامة وكل واحد حط رجلوا هنا كايزيد يرفع الاقتصاد الامريكي لانه كيبقا يشري ويستهلك والطاكس لي هو الضريبة كتفرع فيه وكل نهار يفيق يلقا فاتورة خاصها تخلص .ومع ذلك احسن ب 10000 درجة من المغرب فيه غا الحضايا لي ديما كيفطروا بالشوفان 

اخيرا قريتي هاد البوسط دعي معانا راك ماتلقاش شي بوسط بحال هادا فالفايسبوك كامل ونتحداك كنصحوكم ف سبيل الله ولا بغيتي تعرف اكتر راه الموقع عامر بنويطات ديالي ارا ماتقرا 

لي ماشرا يتنزه  

 سد داك الباب اللور أ جواد