سمع سمع مزيان انا 5 اشهر وانا هنا فامريكا غانعاود ليكم على شي حوايج عمر شي حد يقولهم ليك .
اللغة اخوتي تم اللغة تم اللغة ماتخيلوش كمية المعاناة هنا بلا لغة غاتبقا دور فبلاصتك كنت كانقول ديك الانجليزية لي قراونا غادي نديباني بها الساعة اقسم بالله ان هاديك الانجليزية هنا حشومة تهدر بها النيفو هارب هنا الناس كاتصرط الهدرا حيت كايهدروا باللغة العامية بحال الدارجة المغربية ديالنا. جيب شي كاوري وهدر معاه بها و شوف غادي يبقا غير يبربق فعينيه. شتي الناس هنا لي جات بلا لغة ماتبقا محنسرا فشحال من حاجة كاتفوتها فرص كبيييرة عمرك طور راسك بلا لغة اللغة الانجليزية حيت امريكا هي حياتك هي كولشي ساااالينا، ماتجيبش لامريكا ونتا معلق فالطوبيس جيب رزقك سير تسلف و تكلف بيع اي حاجة. راه شحال من واحد دابا جالس محنسر مالقا خدمة ولا فين يسكن راه ماشي غادي تجي وتلقا بايدن كايتسناك . را غا كل واحد وزهرو كاين لي ضرب شهرين. رجع بحالوا . وكاين لي لقاها كي بغاها وحلف لا يرجع لبلادو.
1 الكراء
هذا فيلم هنا صراحة تخيل بنادم هنا قديم فامريكا وباغي يرحل يبدل ومالقاش راه الكراء مشكل ماشي غا فالسكن ولكن الصراحة داكشي لي كاتصوروا كتحطوا فيه وهنا كاين واحد النظام هو ان كل عام كايزيدوا مابين 150/ 100دولار واقل شقة نقية هنا يه 1200دولار بنادم هنا مسكين محارب غا مع فلوس الكرا. هنا كاين مجمعات سكنية ونزيد راه عندهم الحق يدخلوا لدارك وخاا تكون ولا ماتكونش عندهم الضوبل ديال الساروت . لاكان شي حاجة كايجي كايدق ماحليتيش غايحل الباب ديريكت . يلاه زيد معا هادو ....
2 التقة
صراحة شي حاجة لي غادي تخلي قلبك مرتاح وفرحان شني الناس هنا شبعانين بلا ماتفكر انك زعما غاتنسا شي حاجة وتجي ماتلقاهاش .لالالا اي حاجة حطيتيها فشي بلاصة واخا تغير سيمانة تجي تلقاها. شحال من مرة نسيت الطومويبل محلولة ماكاينش لي يقرب ليها ابدا. فاش تتدخل المجمعات السكنية غاتلقا بزاف د الحوايج محطوطيين وغاليين فالتمن وماكاينش لي يوصلهم . شي حاجة عمرك تحلم بها فشي بلاصة اخرى.
3 التسوق.
نرجعوا للتقة فاش غادخل تقدا هنا عالم اخر ماشي بحال فالبلاد غاتمشي تخلص عند caissière لالا هنا دايرين فيك كامل التقة عندك اختيارات بغيتي تخلص عندو مرحبا مابغيتيش سير خلص راسك تخيل تعمر السلة وسير خلص لي بغيتي ديرو نتا وضميرك ولكن لاحصلتي كاتسرق ناري غايعلقوا اسمك فالدخلة ديال داك المحل لي سرقتي منو غاتولي الامم المتحده كاملة عارفاك . اشبان ليك ديرتثلك ولا تسرق .
You have to change the mindset
4 اضواء الطريق
شي حاجة لي غادي تعقدك هنا ماكاينش البوطوات قلييل ماكاين غا الطرقان وجبد مع راسك . غادي تجيك السياقة قاصحة بلا ضو . لكن كاين هنا واحد السيستم كايحلي كل واحد يشوف فبلاصتو الشانطي واسع ومقسم على 3 او 4 خطوط هاكا / / / / كل واحد واحد ملزم وج اجباري يشد بلاصتو الا دخلتي لعند شي حط الخط ديالو مشيتي فيها. وراه الظلام والسياقة خطيرة بالليل رد بالك مزيان ... وراه معمرك تلقا شي بوليسي واقف فاالطريق كاتسوق ونتا مرتاح البوليسي قليل فين نشوفوا دايز من حداك .
5 الصالير.
باش كايعجبوك هاد الناس ماكايناش شي حاجة سميتها التعطال. فلوسك كايتحطوا ليك فالكونط قبل الوقت ونتا كاعما فراسك . كاتلقا الصالير داز . الناس هنا كانخدم 5 ايام هادا هو القانون كايتسمى FULL TIME فيه 40 ساعة فالاسبوع اما قل من هاد الوقت كايتسمى PART TIME فيه من 1 الى 30 ساعة .الناس ماضيعكش ماتخافش خدم ونتا مرتاح فلوسك فجيبك .
6 الطاكس
الضريبة يا الطاكس هنا اي حاجة كاتخلص عليها الضريبة بغيتي الاسم اخويا تخلص عليه الضريبة. يعني فاش يشكي عليك شي حد هنا بلاما تبقا عليه ونتا فامريكا ونتا ونتا.. علاس ماترجعش ... منيتك الناس هنا محاربة مع الكرا والبيلات او الفاتورات لي ماكيتقادوش😏😏😏 الاقتصاد الامريكي مبني على الضرائب يعني غاتبقا تخلص تخلص ولكن راه الدولة دايرا خدمتها كاين مساعدات إنسانية تخليك ديباني بيدما توقف على رجليك .
6 السيارة
ماتشريش سيارة بتمن رخيص ماتسمعش للناس لي كاتقول ديباني راه اخيب حاجة هنا هو تخسر ليك السيارة غا توحل غا مع الديباناج تفركعك بواحد 200 او 150 دولار . عاد علم الله الميكانيك غادي يضربك حتى تلف . هادشي علاش جيب معاك فلوسك وخود المليح .
7 البنك
البنك هنا اما غادي يخليك تزيد القدام ولا غادي تغرق غرقة مابعدها غرقة . رد بالك وبعد من الكريدي وعنداك تدخل الربا ناري والله تا غادي تندم وانا علمتك.
8 الغربة
غتوحش مالين الدار الفراق صعيب الغربة قاصحة غاتوحش لميمة مسكينة والواليد الحنين والخوت . متنساش تهلا فوالديك سيفط ليههم كل مرة سيفط . هبط للمغرب كل عام ولاكنتى خدام مزيان هبط 2 مرات كاين اوقات التداكر كايكونوا بطاطا . الحياة قصيرة ماتستاهلش .
اخر حاجة صلي بقا تنوض الفجر دائما كول مزيان شري اي حاجة تشهيتيها سافر لبس مع راسك راه كاين هنا غا البياس الحار الدوريجين . بعد من البلية عنداك تمشي عند شي قاصرة .اصلا هنا والله مامسوقين ليك😏
قريتي هادشي دعي معانا والله يحيبك لبلاد العم سام فأقرب فرصة لي قال امين و دعا معانا العام كاي يكون هنا ان شاء الله
تتمة مرة أخرى ان شاء الله تعالى....
إرسال تعليق