النجاح في القرعة الأمريكية هو مجرد خطوة نحو أمريكا

النجاح فالقرعة الأمريكية هو رجل وحدة باش تاخد الفيزا ماشي باش تجي لامريكا لان ماراطون الحصول على الفيزا شاق وماهي للغاية الستريس والقلق كايخليوا بنادم يفقد الامل ف كولشي ولهذا كنصحكم توكل على الله وديرها بيد الله ودير جميع الاسباب لي تخليك ماتلومش راسك من بعد وراه كولشي مكاتب وارزاق 

باش تجي لامريكا راه خاصك تكون داير خطة ومخطط لكل مرحلة مزيان واش كايصحابك غا غاتوصل هنا صافي غاتلقاهم واقفين ليك فالمطار . الانسان كايضيع بزاف د الفرص عوض مايمشي يتعلم صنعة او شهادة يجي هنا ماشي يضرب اللعاقة ديال بصح كايبقاو مقابل الفايسبوك و يسول فواحد عايش فالمغرب . تا كيفاش واحد فالمغرب غادي ينفعك هنا فامريكا. سول الناس لي عايشين هنا التجارب كتختلف من شخص لاخر 

جات فيك القرعة صقل وخلي ديك الخبزة طيب وبدا تفكر كيفاش غادي تسلك راسك ونتا ماعاندك لغة ماعندك فلوس كثيرة ماعندك. لي يوقف معاك كتبقا هنا مجلي الموطيلات غاليين تبغي غاتصايب شي ورقة خاصك لي ديك ولي يترجم ليك 

امريكا بلد الفرص نتا كعزري عندك عام واحد تشري فيه برطما مفرشة المتزوجين هوما لي واحلين هنا بحكم الكرا غالي ومصاريف العائلة 

فكر قبل ماتجي انك خاصك تجي صحيح مافيك لا مرض لا اعراض حيت هاد البلاد غاضرك الضرسة تخلص زبالة د لفلوس

سير صايب سنانك و دير جميع التحاليل وجيب معاك نظاظرك ونظاظر الشمس راه الشواية هنا د الفلوس 

شحال من واحد جا هنا و خوا بيه المستضيف وبقا كينعس فالزنقة وتخيل نتا جاي لامريكا بوراقيك وتنعس فالزنقة وماعارف فين تمشي .هادشي علاش دير حسابك بحث قلب تواصل لابغيتي المعلومة

95٪ جاي لهنا طويل ماعارف تا معلومة على الولاية لي جاي ليها جاهل بالقوانين كايصدق داير شي خطأ و يولي محنسر. علاش قبل ماتجي ماتمشي تقلب وتقرا قوانين البلاد لي جاي ليها قرأ نيشان بعد من هادوك صحاب YouTube لي كايزيدوا فيه ويبيعوك العجل . 

كاين فرق كبير بين عزري او واحد مزوج . نتا كعزري امريكا ديالك عمرك تكون خواف او تبقا تفطر هادي بلاد مستحيل تبقا فيها بلا فلوس لا قوادت كاع تجيب ماكلتك وكراك غير ب delivery وغير ب بيكالة . 

عمرك تربي الكبدة على شي مدينة ولا ولاية نتا جاي هنا باش تلقا راحتك وتبدل حياتك ماعجبكش الحال في خدمة خرج ماتفكرش ثانية . عطا الله الخدمة راهم مالاقينش لي يخدم . فقط خاصك ال طوموبيل باش تبقا تحرك فينما بغيتي 

للعام الأول سير اصاحبي تسارا ودخل لاغلب المحلات باش تطلق مع الشعب الأمريكي. راه هاد الشعب cool كولشي عندهم easy كولشي ميسر الدولة مامعقدا ليك تا حاجة تا من طرق الدفع كاتقوليك غا خود لي تشها خاطرك وبقا تخلص بشوية بشوية

راه 31 سنة فالمغرب عمري شفت بحال امريكا فطرق العيش و التسهيلات لي موفراها هاد الدولة هاد الناس بزاف غير احترم نفسك والقانون بالرب كاتخاف

نتا جاي لامريكا وزرق فاللغة شنو كنتي كادير عام هادي باش خرجات القرعة علاش مامشيتيش تعلمتي اللغة . سمع مزيان بالرب تاتولي مبهدل هنا بلا لغة تاتجرب ورد عليا.