بغيتي تندمج دغيا مع الشعب الأمريكي وتعرف فين دخل وتخرج غا توصل الا عندك فلوس الطوموبيل شريها و دوز بيرمي فالاسبوع الاول لاقدرتي دير هادشي فراك معلم وختصرتي عليك مسافة الألف ميل . ماعندكش شري بيكالة وسير دير delivery عالاقل واحد 4 او 6 اشهر خدم بالليل وبالنهار وصدقني غاتشوف العجب فهاد البلاد .
ملي توصل خود راحتك وعنداك تمشي تخدم ف شي GAS STATION لانه الداخل مفقود والخارج مفقود 99٪ فراك معرض للخطر فاي لحظة يدخلوا عليك شي 2 ولا 3 بالسلاح الا دارو معاك زوين وبقيتي عايش اما احتمال كبير يتيرو فيك راه السلاح هنا بحال طاكوس .
عنداك الصكع تمشي تسرق شي حاجة من شي STORE ولا تقول هانيا ماشغني حد . راه امريكا كلها كاميرات وكاين كاميرات ديال التتبع نتا غادي وهي دايرا معاك . هو الناس هما تقة احتمال كبير انك ماغاديش تحصل ولكن لاحصلتي فراه القانون كايفؤض عليهم بعلقوا صورتك فباب ديال داك المتجر غاتولي مشهور اعشيري اكتر من ميسي غا جرب
خاصك ديما ترد بالك فشي بلاصة فيها الزحام حيت بنادم هنا غارشق ليه كايجبد التراشراش يبغي يجرب مسكين غا حيت قنط ومع ذلك ماكنخلعكش حيت هادشي ماشي ديما كايوقع ولكن راه فاي لحظة يوقع .ولكن راه كاين الامن ديال بصح البوليس قبل ماتقطع المكالمة تلقاهم حداك . الله يعز المخزن ا سيدي
فلوس امريكا كايبقاو فيها غاتبقا تخبط تا تعيا نهار تمرض غا راديو ممكن يطيح عليك ب مليون هادشي باقي ماشافاك الطبيب ولهدا الصحة فا امريكا فراه هاربة ماخصكش تمرض من الاحسن تموت ديريكت . حيت لاماعندكش تأمين 100٪ فراه داكشي لي جمعتيه غاتقياه داك الساعة .
الدولة الأمريكية كاتشاور مع المواطنين ديالها حيت هوما جزء من الدستور ولهدا هاد الدولة فضلها علينا كبير من بعد الله تعالى وبلادنا الحبيبة المغرب كذلك . عمرها تخليك اومبان كاين الف طريقة باش تعيش وتجيب عومااار خاصك غاتكون ولد الناس ومافيك تابلية وجاي تخدم فقط وتعيش .
ماشي بلان غاتوصل من الماطر وتبدا تقلب على خدمة مالك أصاحبي كنتي مشدود سير سافر ودير delivery باش تعرف فين تمشي وتجي كول لي بغيتي شري البياسة الحار حيد ديك الحرقة عاد بدا تقلب على خدمة حيت من بعد غاتولي من الخدمة للدار ومن الدار للخدمة ومن الخدمة للخدمة
مزوج ماشي هو بوحدو المزوج مسكين واكل الدق وماكايشيط والو ماشي كيفما كاتخيل داكشي ديال الاكشن و MBC2 والارنبات وداكشي تشا ريح ماكاين غا الخدمة والسطريس ودبلوم او قراية او حرفة هوما لي غادي يفاريوها ليك هنا .
غاتولي مبلي بالمونادا والفريت فيهما دخلتي غاتلقاهم مايمكنش راه لواحد الدرجة ماكتخيلش. FAST FOOD هوما باش عايش الشعب الأمريكي. وتانتا هادشي باش غاتعيش حيت ماكاينش الوقت باش تصايب شي كاميلة الا من رحم الله .
كاين لي هنا 15 لعام وباقي مخاري مع اللغة بل كاينطق TALK ب طولك هاويييلي اسميتك الله . فلهدا اللغة الانجليزية حيت عشق صراحة والاتقان ديالها حلم لي خاصة . بمخارج الحروف والنطق السليم هادي هي اللغة الانجليزية اما ديك اللغة د بن احمد خليها ف الليسي ديال المغرب
الشعب الأمريكي شعب منفتح وخوار ماكاين غا HELLO . How ARE DOING يلاه تا انا غانقوليك BYE BYE
إرسال تعليق